આંસુઓને

છલકાઈ રહી છે આંખો

આંસુઓ તમે થોડી ધીરજ રાખો

વહી જવાની કરશો ના મનમાની

છે બુંદ બુંદમાં વાતો ઘણી ય છાની

ખુદની ખારાશ ખુદમાં રાખો

તમે થોડી ધીરજ રાખો

ડુસકાઓને ઓગળવા દો

દુખને દુખમાં ભળવા દો

ભીનાશ ઉની ભીતર ઢાંકો

તમે થોડી ધીરજ રાખો

પીડાની નહીં કરવી લ્હાણી

રૂદનને ના ફૂટે વાણી

પ્રીતનો પાલવ મળશે ઝાંખો

તમે થોડી ધીરજ રાખો

પાંપણે ના બનશો તોરણ

પુનિત પરમ તમે જળ દર્પણ

તો શાને નિજને ધૂળમાં નાખો ?

આંસુઓ તમે થોડી ધીરજ રાખો.

નીતિન વિ મહેતા