ગાગરની ધાર

નંદવાય નહીં ભરી ગાગર સખી

ન છૂટે રસીલા નીર

આંખોમાં સાચવ્યા સપનાના સરોવર

લટ મહી પૂર્યા વહેતા સમીર

મારગે મ્હેણાં મળશે એ જાણું

ને વાગશે કેડીએ કાંટા

મનની મહોલાતે ઉછળતી ઈચ્છા

દેશે અદીઠ રહી શાતા

આશા અભિલાષા રહેશે અતૂટ

ભલે ચરણોથી વહે રૂધિર

ન છૂટે રસિલા નીર

પગલામાં અટવાશે શંકાના કંકર

પણ ઉરે તો શ્રધ્ધા અપાર

ગમતી ગોફણની જોઉ છું રાહ

વહે ભાંગેલ ગાગરની ધાર

વહેતા વારિને આલિંગન દેવા

સખી હૈયું હવે છે અધીર

ન છૂટે રસિલા નીર