હરિ, મારી નિકટ રહેજો

હરિ, મારી નિકટ રહેજો

વિકટ પંથે ચરણ ડગમગે, તો પ્રાણમાં

શ્રધ્ધાનો થઈ દીપ પ્રકટજો

હરિ, મારી નિકટ રહેજો.

ફૂલ ઊગ્યું આશાનું ભીતર, જોજો એ ના કરમાય

હિમંતના હલેસા દેજો, ભલે તોફાની દરિયો છલકાય

નિર્મળ નયને કરું ઝંખના

મનને નિર્ભય કરજો

હરિ, મારી નિકટ રહેજો

વાગે ઠોકર પથ્થરની, કે આડે આવે પહાડ

તમે જ સ્વજન ને વ્હાલા, ખોલજો તેજ તણા કમાડ

ઊરે ઉભરાય તરંગ ખુશીના,

પગલે પગલે, ઝળહળજો

હરિ, મારી નિકટ રહેજો

નીતિન વિ મહેતા